ໃນວັນທີ 27 ມິຖຸນາ 2024 ທີ່ ຫ້ອງປະຊຸມໃຫຍ່ ຊັ້ນ II ຂອງ ອປຊ ໄດ້ຈັດພິທີເປີດກອງປະຊຸມໃຫ່ຍຄັ້ງທີ II ຂອງ ໜ່ວຍຊາວໜຸ່ມ ອົງການປະກັນສັງຄົມແຫ່ງຊາດ ຂື້ນຢ່າງເປັນທາງການ ພາຍໃຕ້ການເປັນປະທານ ຂອງ , ສະຫາຍ ຄໍາໄຊ ເຊ່ຍຢີ້ງຢ່າງ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ທັງເປັນເລຂາຄະນະບໍລິຫານງານຊາວໜຸ່ມ ກະຊວງ ຮສສ, ເປັນກຽດເຂົ້າຮ່ວມມີ ສະຫາຍ ນາງ ບົວຫອມ ພົມມະຈັນ ກໍາມະການໜ່ວຍພັກ ອປຊ, ຮອງຫົວໜ້າອົງການປະກັນສັງຄົມແຫ່ງຊາດ, ມີຕາງໜ້າ 03 ຈາກອົງການຈັດຕັ້ງມະຫາຊົນ ແລະ ສະມາຊິກຊາວໜຸ່ມເຂົ້າຮ່ວມທັງໝົດ 79 ສະຫາຍ, 52 ຍິງ ສະຫາຍ.

 

ກອງປະຊຸມ ສະຫາຍ ດາວອນ ຜາມີໄຊ ຫົວໜ້າໜ່ວຍຊາວໜຸ່ມ ອົງການປະກັນສັງຄົມແຫ່ງຊາດ ໄດ້ຂື້ນຜ່ານບົດລາຍງານການເຄື່ອນໄຫວວຽກງານຂອງໜ່ວຍຊາວໜຸ່ມໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ກອງປະຊຸມໄດ້ຮັບຮອງເອົາບົດລາຍງານ ແລະ ການເຫັນດີເປັນເອກະພາບ ຕໍ່ບົດສຳຫຼວດຜ່ານມາຂອງຄະນະໜ່ວຍຊຸດເກົ່າ ແລະ ຄະນະຊຸດເກົ່າໄດ້ຂື້ນກ່າວລາໜ້າທີ່. ກອງປະຊຸມໄດ້ຈັດຕັ້ງປ່ອນບັດຄັດເລືອກເອົາຄະນະໜ່ວຍຊາວໜຸ່ມຊຸດໃໝ່ ມີຜູ້ສະໝັກ 07 ສະຫາຍ, ໃນນັ້ນກອງປະຊຸມໃຫຍ່ ຄັ້ງທີ II ໜ່ວຍຊາວໜຸ່ມ ອປຊ ໄດ້ເລືອກຕັ້ງເອົາຄະນະຊາວໜຸ່ມຊຸດໃໝ່ ມີ 05 ສະຫາຍ, ດັ່ງນີ້:

 

1. ສະຫາຍ ນາງ ແອງນີ ໄຊຍາສຸບັດ ເປັນຫົວໜ້າໜ່ວຍ

2. ສະຫາຍ ນາງ ອຸດຕະມະ ມິດທະສອນ ເປັນຮອງຫົວໜ້າໜ່ວຍ

3. ສະຫາຍ ສັນນະຄອນ ບຽນທະນົງ ເປັນຮອງຫົວໜ້າໜ່ວຍ

4. ສະຫາຍ ນາງ ສົມບັດ ສອນວິລັດ ເປັນກໍາມະການໜ່ວຍ

5. ສະຫາຍ ວົງສະຫວັນ ລາສະສານ ເປັນກໍາມະການໜ່ວຍ

 

ໃນກອງປະຊຸມ ຄະນະປະທານ ໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນການປະກອບສ່ວນເຄື່ອນໄຫວວຽກງານຊາວໜຸ່ມ ໃນໄລຍະທີ່ຜ່ານມາ, ພ້ອມທັງໃຫ້ຄໍາໂອ້ລົມ ແລະ ທິດຊີ້ນໍາ ຕໍ່ຄະນະໜ່ວຍຊາວໜຸ່ມ ອປຊ ຊຸດໃໝ່ ເພື່ອເປັນແນວທາງໃນການເຄື່ອນໄຫວວຽກງານໃນຕໍ່ໜ້າ ດັ່ງນີ້:

 

¬ ພ້ອມກັນສືບຕໍ່ສຶກສາອົບຮົມດ້ານການເມືອງແນວຄິດ ໃຫ້ສະມາຊິກຊາວໜຸ່ມ ພາຍໃນໜ່ວຍ ໃຫ້ເປັນປົກກະຕິ ແລະ ເປັນສິ່ງສໍາຄັນ;

¬ ຮຽກຮ້ອງໃຫ້ຄະນະຊາວໜຸ່ມຊຸດໃໝ່ ໃຫ້ເອົາໃຈໃສ່ນໍາພາສະມາຊິກຂອງຕົນ ຮ່ວມຊີວິດປະຈໍາເດືອນໃຫ້ເປັນປົກກະຕິ ເພື່ອຜັນຂະຫຍາຍດ້ານດີ ແລະ ພ້ອມກັນແກ້ໄຂດ້ານອ່ອນ ໃຫ້ມີຄວາມກ້າວໜ້າ ພ້ອມທັງນໍາເອົາເອກະສານ ທີ່ສໍາຄັນມາເຜີຍແຜ່ ເຊັ່ນ: ມະຕິຄໍາສັ່ງ, ຂໍ້ກໍານົດ, ກົດໝາຍ, ກົດລະບຽບຂອງກົມກອງ, ກົດລະບຽບຂອງສູນກາງຊາວໜຸ່ມປະຊາຊົນປະຕິວັດລາວ ມາຜັນຂະຫຍາຍຈັດຕັ້ງເຜີຍແຜ່ເຊື່ອມຊຶ່ມໃຫ້ສະມາຊິກຂອງຕົນຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດ ເປັນແຕ່ລະໄລຍະ;

¬ ໃຫ້ປັບປຸງແບບແຜນວີທີນໍາພາ, ແບບແຜນວິທີການເຮັດວຽກໃຫ້ມີປະສິດທິຜົນສູງ;

¬ ປຸກລະດົມໃຫ້ສະມາຊິກ ເພີ່ມທະວີຄວາມສາມັກຄີ-ຮັກແພງຊ່ວຍເຫຼືອເຊິ່ງກັນແລະກັນ ມີຄວາມເປັນເອກະພາບໃນການປະຕິບັດໜ້າທີ່ວຽກງານ ເປັນໝູ່ຄະນະ;

¬ ສືບຕໍ່ຮັກສາມູນເຊື້ອ ວັດທະນະທໍາອັນດີງາມຂອງຊາດ ກໍ່ຄື ຮີດຄອງປະເພນີ.

¬ ເອົາໃຈໃສ່ຈັດຕັ້ງປະຕິບັດ, ກວດກາ, ປະເມີນຜົນຂອງຂະບວນການແຂ່ງຂັນ 4ບຸກ ໃນຕໍ່ໜ້າໃຫ້ປະກົດຜົນເປັນຈິງ;

¬ ສະມາຊິກຊາວໜຸ່ມ ຕ້ອງມີຄວາມດຸໝັ່ນຫ້າວຫັນ ຕັດສິນໃຈສູງຕໍ່ວຽກງານ ວິຊາສະເພາະຂອງຕົນ, ມີໄຫວຜິກໃນການພັດນາຕົນເອງ ແລະ ຊອກຮູ້ຮໍ່າຮຽນນຳບັນດາ ວຽກງານເຕັກໂນໂລຊີ ໃຫ້ມີຄວາມທັນສະໄໝ ເພື່ອນໍາມາພັດທະນາອົງກອນຂອງຕົນ.

 

ຈາກນັ້ນ, ຕາງໜ້າໜ່ວຍຊາວໜຸ່ມ ອປຊ ຊຸດໃໝ່ ໄດ້ຂື້ນກ່າວຮັບຄໍາໂອວາດ ແລະ ປະຕິຍານຕົນ. ກອງປະຊຸມໃຫຍ່ຄັ້ງທີ II ຂອງ ໜ່ວຍຊາວໜຸ່ມ ອົງການປະກັນສັງຄົມແຫ່ງຊາດ ໄດ້ສໍາເລັດລົງໃນຕອນທ່ຽງຂອງມື້ດຽວກັນ.