ໃນວັນທີ 19 ມີນາ 2024 ທີ່ ນະຄອນຫຼວງຮ່າໂນ້ຍ ສສ ຫວຽດນາມ, ປະກັນສັງຄົມລາວ ນໍາໂດຍ ທ່ານ ນາງ ບົວຫອມ ພົມມະຈັນ ຮອງຫົວໜ້າອົງການປະກັນສັງຄົມແຫ່ງຊາດລາວ (LSSO) ພ້ອມດ້ວຍຄະນະ ໄດ້ເຄື່ອນໄຫວແລກປ່ຽນບົດຮຽນ ໃນຫົວຂໍ້: ການຈັດຕັ້ງປະຕິບັດວຽກງານກວດກາ, ນະໂຍບາຍປະກັນສັງຄົມ, ການປະກັນສຸຂະພາບ ແລະ ອຸດໜູນວ່າງງານ, ໂດຍການຕ້ອນຮັບອັນອົບອຸ່ນຂອງ ທ່ານ ຫງວຽນດຶກຮ່ວາ ຮອງຜູ້ອໍານວຍການໃຫຍ່ ອົງການປະກັນສັງຄົມຫວຽດນາມ (VSS) ພ້ອມດ້ວຍຄະນະ, ມີຄະນະເຈົ້າໜ້າທີ່ກວດກາປະກັນສັງຄົມ, ຄະນະກົມ, ຄະນະພະແນກ ແລະ ວິຊາການຂອງສອງຝ່າຍເຂົ້າຮ່ວມ.

 

ທ່ານ ຫງວຽນດຶກຮ່ວາ ຮອງຜູ້ອຳນວຍການໃຫຍ່ VSS ໄດ້ໃຫ້ກຽດກ່າວຕ້ອນຮັບຢ່າງອົບອຸ່ນ ແລະ ທ່ານໄດ້ຍົກໃຫ້ເຫັນຄວາມສຳຄັນຂອງການເຄື່ອນໄຫວແລກປ່ຽນບົດຮຽນວິຊາການຂອງສອງອົງການເພື່ອ ແນໃສ່ຖອດຖອນບົດຮຽນທີ່ດີຈາກການຈັດຕັ້ງປະຕິບັດເພື່ອນນຳໄປປັບປຸງນິຕິກໍາ, ລະບຽບການຕ່າງໆທີ່ກ່ຽວຂ້ອງໃຫ້ສອດຄ່ອງ ແລະ ວິທີການຈັດຕັ້ງປະຕິບັດທີ່ມີປະສິດທິຜົນ, ການເຄື່ອນໄຫວຄັ້ງນີ້ແມ່ນ ພາຍໃຕ້ກອບການຮ່ວມມື ລະຫວ່າງ ອົງການປະກັນສັງຄົມແຫ່ງຊາດ ສປປ ລາວ LSSO ແລະ ອົງການປະກັນສັງຄົມວຽດນາມ VSS ແນໃສ່ຮັດແໜ້ນສາຍພົວພັນມິດຕະພາບອັນເປັນມູນເຊື້ອ ແລະ ແລກປ່ຽນບົດຮຽນທາງດ້ານວິຊາການ, ທ່ານຍັງຍົກໃຫ້ເຫັນ ບົດຮຽນໃນການຈັ້ດຕັ້ງປະຕິບັດວຽກງານປະກັນສັງຄົມຫວຽດນາມ ທີ່ໄດ້ມີການພັດທະນາຢ່າງຕໍ່ເນື່ອງ ປະຈຸບັນສາມາດກວມເອົາການປົກຄຸມດ້ານປະກັນສັງຄົມ ແລະ ປະກັນສຸຂະພາບ ເຖີງ 94%ຂອງປະຊາກອນ, ເປັນລະບົບຄົບຊຸດສາມາດຕອບສະໜອງອຸດໜູນຕ່າງໆ ແລະ ຮັບປະກັນສິດຜົນປະໂຫຍດດ້ານປະກັນສັງຄົມ, ສາມາດຫັນລະບົບການຄຸ້ມຄອງບໍລິຫານເປັນທັນສະໄໝ ແລະ ສາມາດຄຸ້ມຄອງກອງທຶນໃຫ້ເຕີບໃຫຍ່ຍຂະຫຍາຍຕົວ.

 

ໃນການເຄື່ອນໄຫວຄັ້ງນີ້ ທີມງານປະກັນສັງຄົມລາວ ຍັງໄດ້ຢ້ຽມຢາມ ແລະ ແລະ ແລກປ່ຽນບົດຮຽນຢູ່ ອົງການປະກັນສັງຄົມ ແຂວງນິງບິງ ແລະ ອົງການປະກັນສັງຄົມ ແຂວງແທງຮ້ວາ ຊຶ່ງສອງແຂວງດັ່ງກ່າວໄດ້ມີການສະເໜີບົດຮຽນການຈັດຕັ້ງປະຕິບັດອຸດໜູນປະກັນສຸຂະພາບ, ອຸດໜູນການວ່າງງານ ແລະ ການລົງປະຕິບັດໜ້າທີ່ຂອງເຈົ້າໜ້າທີ່ກວດກາປະກັນສັງຄົມຂັ້ນແຂວງ ຊຶ່ງເຫັນໄດ້ວ່າ ວຽກງານກວດກາປະກັນສັງຄົມມີບົດບາດສຳຄັນ ຕ້ອງປະຕິບັດຄ່ຽງຄູ່ກັບການບໍລິການອື່ນໆ ເພາະນອກຈາກການລະດົມ ແລະ ຊຸກຍູ້ການການເຂົ້າເປັນສາມະຊິກປະກັນສັງຄົມແລ້ວ ການເກັບເງິນສົມທົບ ແລະ ການປະຕິບັດອຸດໜູນຕ່າງໆຕ້ອງຮັບປະກັນຄວາມຖືກຕ້ອງ, ລະບົບການກວດກາຖືວ່າເປັນວຽກງານທີ່ມີບົດບາດສຳຄັນ ຊື່ງປະກັນສັງຄົມລາວຕ້ອງຖອດຖອນບົດຮຽນ.