ເພື່ອເປັນການທົບທວນການຈັດຕັ້ງປະຕິບັດວຽກງານປະກັນສັງຄົມໃນໄລຍະ 01 ປີ ທີ່ຜ່ານມາ ເວົ້າລວມ ເວົ້າສະເພາະກໍ່ຄື ການບັນລຸຕົວເລກຄາດໝາຍສູ້ຊົນໃນປີ 2023. ໃນລະຫວ່າງວັນທີ 16-17 ມັງກອນ 2024, ອົງການປະກັນສັງຄົມແຫ່ງຊາດ (ອປຊ) ໄດ້ຈັດກອງປະຊຸມວຽກງານປະກັນສັງຄົມ ປະຈໍາປີ 2023 ທີ່ ຫ້ອງປະຊຸມໃຫຍ່ ອປຊ ນະຄອນຫຼວງວຽງຈັນ, ພາຍໃຕ້ການເປັນປະທານຂອງ ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ທັງເປັນຮອງປະທານສະພາບໍລິຫານ ອປຊ, ມີ ຄະນະອົງການປະກັນສັງຄົມແຫ່ງຊາດ, ຫົວໜ້າຫ້ອງການກະຊວງ ຮສສ, ບັນດາຜູ້ຕາງໜ້າຈາກບັນດາກົມພາຍໃນ ກະຊວງ ຮສສ, ພະແນກການ, ຫ້ອງການປະກັນສັງຄົມແຂວງ ພ້ອມດ້ວຍພະນັກງານວິຊາການຫຼັກແຫຼ່ງ ອປຊ ທົ່ວປະເທດ ເຂົ້າຮ່ວມຢ່າງພ້ອມພຽງ.
 
ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ ໄດ້ໃຫ້ກຽດຂື້ນກ່າວຄວາມໝາຍຄວາມສໍາຄັນ ແລະ ເປີດປະຊຸມປະຈໍາປີ 2023 ຂອງ ອປຊ ຂື້ນຢ່າງເປັນທາງການ, ທ່ານກ່າວວ່າ: ອົງການປະກັນສັງຄົມແຫ່ງຊາດ ໄດ້ຖືເອົາວາລະການຈັດກອງປະຊຸມ ປະຈໍາປີ ຂອງຕົນ ເພື່ອເປັນເວທີໃນການແລກປ່ຽນ ແລະ ຖອດຖອນບົດຮຽນ ການຈັດຕັ້ງປະຕິບັດການເຄື່ອນໄຫວວຽກງານໃນໄລຍະຜ່ານມາ ຊຶ່ງໃນປີນີ້ ກໍ່ໄດ້ພ້ອມກັນສໍາມານາໃນຫົວຂໍ້ວິຊາການທີ່ຈໍາເປັນຈໍານວນໜຶ່ງໃນວັນທີ 16 ມັງກອນ ນີ້ ໂດຍໄດ້ລົງເລິກສຸມໃສ່ແລກປ່ຽນບົດຮຽນໃນການຈັດຕັ້ງປະຕິບັດ ໃນຂົງເຂດວຽກງານອຸດໜູນ ການກວດສອບຂໍ້ມູນ ແລະ ການຂື້ນທະບຽນ 12 ຕົວເລກ, ຜູ້ຮັບອຸດໜູນໄລຍະຍາວພາກລັດໃນທົ່ວປະເທດ, ວຽກງານກວດສອບພາຍໃນ ໂດຍຍົກໃຫ້ເຫັນຂໍ້ຄົງຄ້າງຂອງການປະຕິບັດອຸດໜູນປະຕິບັດວຽກງານປະກັນສັງຄົມຕ່າງໆທີ່ໄດ້ພົບເຫັນ ແລະ ວຽກງານຂໍ້ມູນຂ່າວສານເທັກໂນໂລຊີ ໂດຍສະເພາະແມ່ນການຈັດຕັ້ງປະຕິບັດຫ້ອງການທັນສະໄໝ e-office ນອກນັ້ນຍັງໄດ້ເອກະພາບກ່ຽວກັບຮູບແບບ ແລະ ວິທີການໂຄສະນາປະຊາສໍາພັນຢ່າງກ້ວາງຂວາງ ຄຽງຄູ່ກັບການສ້າງຜະລິດຕະພັນໂຄສະນາທີ່ຕິດພັນກັບຈຸດພິເສດຂອງແຕ່ລະທ້ອງຖິ່ນເພື່ອຮັບປະກັນໃຫ້ຂໍ້ມູນຂ່າວສານເຂົ້າເຖິງທຸກກຸ່ມເປົ້າໝາຍ, ການສ້າງຄວາມພ້ອມໃຫ້ການບໍລິການແບບເຄື່ອນທີ່ຂອງແຕ່ລະທ້ອງຖິ່ນ ແລະ ການປຶກສາຫາລືວຽກງານວິຊາການກ່ຽວກັບບັນຫາຕ່າງໆເພື່ອຄວາມເອກະພາບໃນການຈັດຕັ້ງປະຕິບັດ, ຊຶ່ງຜ່ານການຈັດຕັ້ງປະຕິບັດວຽກງານໃນໄລຍະໜຶ່ງປີຜ່ານມາ ອປຊ ໄດ້ມີຄວາມພະຍາຍາມ ທຸ້ມເທເຫື່ອແຮງ ແລະ ສະຕິປັນຍາ ເຂົ້າໃນການປະຕິບັດວຽກງານຕາມພາລະບົດບາດ ແລະ ຄວາມຮັບຜິດຊອບຂອງຕົນ ດ້ວຍຄວາມຫ້າວຫັນ ເຫັນໄດ້ວ່າມີຫຼາຍດ້ານທີ່ສາມາດບັນລຸຕາມລະດັບຄາດໝາຍຕາມແຜນການທີ່ວາງໄວ້ ແລະ ມີສິ່ງໃໝ່ໆຫຼາຍຢ່າງເກີດຂຶ້ນໃນໄລຍະເວລາອັນສັ້ນໆ ຊຶ່ງລ້ວນແຕ່ໄດ້ມາຈາກຄວາມພະຍາຍາມຂອງບັນດາພະນັກງານອ້າຍເອື້ອຍນ້ອງພະນັກງານຂອງພວກເຮົາ ພ້ອມກັນນັ້ນຍັງໄດ້ພ້ອມກັນຄົ້ນຄ້ວາ ແລະ ປະດິດສ້າງໃຫ້ມີຄວາມສອດຄ່ອງເຮັດໃຫ້ວຽກງານຫຼາຍດ້ານໄດ້ຮັບການປັບປຸງ ວຽກງານໂຄສະນາເຜີຍແຜ່ໄດ້ຮັບການຈັດຕັ້ງປະຕິບັດດ້ວຍຄວາມຫຼາກຫຼາຍຊ່ອງທາງ ຄຽງຄູ່ກັບການສ້າງ ແລະ ປັບປຸງຜະລິດຕະພັນສື່ໂຄສະນາຕ່າງໆໃຫ້ມີຄວາມເໝາະສົມເພື່ອເຂົ້າເຖິງທຸກກຸ່ມເປົ້າໝາຍ ລະບົບກົນໄກການຈັດຕັ້ງປະຕິບັດບໍລິຫານກອງທຶນໄດ້ຮັບການປັບປຸງໃຫ້ເປັນລະບົບທີ່ຫັດກຸມ ໂປ່ງໃສ ແລະ ສາມາດກວດສອບໄດ້, ການປັບປຸງ ແລະ ພັດທະນາວຽກງານປະກັນສັງຄົມໃນການສະໜອງບໍລິການແກ່ຜູ້ປະກັນຕົນໄດ້ຮັບການປັບປຸງໃຫ້ເປັນລະບົບທີ່ກະທັດຫັດ ຫັນໄປສູ່ທັນສະໄໝ ແລະ ວ່ອງໄວຂື້ນ.
 
ກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດວຽກງານປະກັນສັງຄົມໃນໄລຍະ 01 ປີ ທີ່ຜ່ານມາ ໂດຍທ່ານ ນາງ ບົວຫອມ ພົມມະຈັນ ຮອງຫົວໜ້າອົງການປະກັນສງຄົມແຫ່ງຊາດ, ເຊິ່ງທ່ານໄດ້ສະແດງໃຫ້ເຫັນເຖິງຜົນ ຂອງການປະຕິບັດ 04 ຕົວເລກຄາດໝາຍສູ້ຊົນທີ່ຍາດມາໄດ້ ຄື: 1. ວຽກງານໂຄສະນາປະຊາສໍາພັນ ໄດ້ໂຄສະນາປະຊາສໍາພັນໃຫ້ບັນດາອົງການຈັດຕັ້ງພາກລັດ, ວິສາຫະກິດ ແລະ ສະໝັກໃຈ ໄດ້ 872 ຄັ້ງ ເທົ່າກັບ 109% ຂອງແຜນການປີ, ລວມມີຜູ້ອອກແຮງງານໃນນັ້ນ 69.869 ຄົນ, ມີຜູ້ຮັບຟັງ 31.336 ຄົນ, ໃນນັ້ນ ສູນກາງໄດ້ 242 ຄັ້ງ ເທົ່າກັບ 121% ແລະ ທ້ອງຖິ່ນ 630 ຄັ້ງ ໄດ້ 105%; 2. ການຂື້ນທະບຽນຫົວໜ່ວຍວິສາຫະກິດໃໝ່ໄດ້ 403 ຫົວໜ່ວຍ ເທົ່າກັບ 115% ຂອງແຜນການປີ, ຂື້ນທະບຽນຜູ້ປະກັນຕົນເກົ່າ ແລະ ໃໝ່ທັງໝົດ 52.509 ຄົນ ເທົ່າກັບ 166% ຂອງແຜນການປີ, ໃນນັ້ນ ຂື້ນທະບຽນພະນັກງານ-ລັດຖະກອນໄດ້ 2.251 ຄົນ, ຍິງ 704 ຄົນ ເທົ່າກັບ 150% ຂອງແຜນການປີ, ຂຶ້ນທະບຽນຜູ້ອອກແຮງງານໃໝ່ຈາກວິສະຫະກິດເກົ່າ-ໃໝ່ ໃນຫົວໜ່ວຍວິສາຫະກິດໄດ້ 43.518 ຄົນ, ຍິງ 15.010 ຄົນ ເທົ່າກັບ 161% ຂອງແຜນການປີ, ຮັບຜູ້ສະໝັກໃຈໃໝ່ເຂົ້າປະກັນສັງຄົມໄດ້ 6.740 ຄົນ, ຍິງ 3.119 ຄົນ ເທົ່າກັບ 224% ຂອງແຜນການປີ; ປະຈຸບັນມີຜູ້ປະກັນຕົນທີ່ຂຶ້ນທະບຽນ ແລະ ຈ່າຍເງິນສົມທົບທັງໝົດ 353.962 ຄົນ, ຍິງ 172.618 ຄົນ (ບໍ່ລວມພາກສ່ວນ ປກຊ, ປກສ),ໃນນີ້ ຜູ້ປະກັນຕົນຈາກພາກລັດ 174.510 ຄົນ, ຍິງ 82.864 ຄົນ, ພາກວິສາຫະກິດ 152.659 ຄົນ, ຍິງ 77.515 ຄົນ ແລະ ຜູ້ສະໝັກໃຈ 26.793 ຄົນ, ຍິງ 12.302 ຄົນ ແລະ ມີຫົວໜ່ວຍວິສາຫະກິດທີ່ຈ່າຍເງິນສົມທົບທັງໝົດ 3.382 ຫົວໜ່ວຍ; ມີຜູ້ເກີດສິດປິ່ນປົວສຸຂະພາບລວມທັງສະມາຊິກຄອບຄົວຂອງເຂົາເຈົ້າທັງໝົດ 867.277 ຄົນ ຍິງ 446.340 ຄົນ, ໃນນີ້ພາກລັດ 493.841 ຄົນ ເປັນຍິງ 255.340 ຄົນ ພາກວິສາຫະກິດ ແລະ ຜູ້ສະໝັກໃຈ 373.436 ຄົນ ຍິງ 191.008 ຄົນ ; 3. ເກັບລາຍຮັບໄດ້ທັງໝົດ 1.723,01 ຕື້ກີບ ເທົ່າກັບ 113% ຂອງແຜນການປີ, ໃນນີ້ພາກລັດ 1.145,23 ຕື້ກີບ ເທົ່າກັບ 125% ຂອງແຜນການປີ, ພາກວິສາຫະກິດ ແລະ ສະໝັກໃຈ 577,77 ຕື້ກີບ ເທົ່າກັບ 95% ຂອງແຜນການປີ; ປະຕິບັດລາຍຈ່າຍທັງໝົດ 1.364,03 ຕື້ກີບ ເທົ່າກັບ 92% ຂອງແຜນການປີ ໃນນີ້ລາຍຈ່າຍພາກລັດ 1.123,63 ຕື້ກີບ ເທົ່າກັບ 97% ຂອງແຜນການປີ ແລະ ລາຍຈ່າຍພາກວິສາຫະກິດ ແລະ ສະໝັກໃຈ 240,40 ຕື້ກີບ ເທົ່າກັບ 74% ຂອງແຜນການປີ; ຜົນໄດ້ຮັບສະເພາະໃນໄລຍະປີ2023 ມີຍອດເຫຼືອທັງໝົດ 358,97 ຕື້ກີບ, ໃນນີ້ພາກລັດ 21,60 ຕື້ກີບ, ພາກວິສາຫະກິດ ແລະ ສະໝັກໃຈ 337,36 ຕື້ກີບ; 4. ພິຈາລະນາ, ຄິດໄລ່ ແລະ ສຶບຕໍ່ຈ່າຍອຸດໜູນປະກັນສັງຄົມປະເພດຕ່າງໆທັງໝົດ 91,620 ເທື່ອຄົນ ເປັນຍິງ 46,758 ຄົນ ມີ 633.595 ເທື່ອຈ່າຍ, ໃນນີ້ພາກລັດມີ 57,121 ເທື່ອຄົນ ເປັນຍິງ 25,210 ຄົນ ມີ 531,288 ເທື່ອຈ່າຍ, ພາກວິສາຫະກິດ ແລະ ຜູ້ສະໝັກໃຈ ມີ 34,499 ເທື່ອຄົນ ເປັນຍິງ 21,548 ຄົນ ມີ 102.307 ເທື່ອຈ່າຍ. ສໍາລັບວຽກງານຈຸດສຸມ ໄດ້ສຳເລັດການໄປທັດສະນະສືກສາ ເພື່ອແລກປ່ຽນບົດຮຽນຂອງຄະນະກໍາມະການສະພາບໍລິຫານ ອົງການປະກັນສັງຄົມແຫ່ງຊາດລາວ ແລະ ປະກັນສັງຄົມ ຫວຽດນາມ ຕາມບົດບັນທຶກຄວາມເຂົ້າໃຈທີ່ໄດ້ລົງນາມຮ່ວມກັນ ແລະ ສົ່ງພະນັກງານ ອປຊໄປທັດສະນະສຶກສາ ເພື່ອແລກປ່ຽນວຽກງານງານປະກັນສັງຄົມກັບປະກັນສັງຄົມອິນໂດເນເຊຍ ເຊິ່ງມີຜູ້ຕາງໜ້າຈາກອົງການແຮງງານສາກົນປະຈໍາລາວ, ສູນກາງສະຫະພັນກໍາມະບານລາວ, ອົງການອ໋ອກຟາມ ໂດຍການສະໜັບສະໜູນຈາກ ອົງການແຮງງານສາກົນ (ILO); ການສ້າງ ແລະ ປັບປຸງນິຕິກຳ: ສຳເລັດຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບປັບປຸງກົດໝາຍວ່າດ້ວຍການປະກັນສັງຄົມ, ການແຕ່ງຕັ້ງຄະນະກຳມະການ ການລົງທຶນຂອງກອງທຶນປະກັນສັງຄົມແຫ່ງຊາດ ແລະ ການຮັບຮອງເງິນເດືອນປະກັນຕົນສະເລ່ຍ ໃນປີ 2022 ແລະ ເງິນເດືອນປະກັນຕົນສະເລ່ຍຄາດຄະເນ ຂອງຜູ້ປະກັນຕົນທັງໝົດ ໃນປີ 2023; ສຳເລັດເຜີຍແຜ່ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຫ້ອງການປະກັນສັງຄົມ ແຂວງ, ນະຄອນຫຼວງ ແລະ ສູນປະກັນສັງຄົມ ຂັ້ົ້ນເມືອງ, ເທດສະບານ, ນະຄອນ ຢູ່ແຂວງ ຄຳມ່ວນ, ສະຫວັນນະເຂດ ແລະ ນະຄອນຫຼວງວຽງຈັນ; ສຳເລັດການຈັດກອງປະຊຸມຄະນະຮັບຜິດຊອບປັບປຸງກົດໝາຍ ວ່າດ້ວຍການປະກັນສັງຄົມ ເພື່ອແບ່ງໜ້າທີ່ຄວາມຮັບຜິດຊອບຂອງຄະນະ ແລະ ແຜນການເຄື່ອນໄຫວ ໃນການຈັດຕັ້ງປະຕິບັດປັບປຸງກົດໝາຍ ແລະ ຈັດກອງປະຊຸມ ປະເມີນການຈັດຕັ້ງປະຕິບັດກົດໝາຍວ່າດ້ວຍປະກັນສັງຄົມຢູ່ ຂັ້ນສຸນກາງ ແລະ ທ້ອງຖິ່ນ, ສຳເລັດບົດລາຍງານການປະເມີນ ແລະ ສົມທົບກັບພາກສ່ວນກ່ຽວຂ້ອງປັບປຸງເນື້ອໃນກົດໝາຍ; ສຳເລັດການຈັດກອງປະຊຸມເຜີຍແຜ່ ຜົນການຄໍານວນຄະນິດສາດປະກັນສັງຄົມ; ໄດ້ສົມທົບກັບກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງ ຈັດກອງປະຊຸມຂັ້ນຄະນະນໍາກະຊວງ 02 ຄັ້ງ, ວິຊາການ 03 ຄັ້ງ ເພື່ອແກ້ໄຂບັນຫາການຈັດຕັ້ງປະຕິບັດອຸດໜູນປິ່ນປົວສຸຂະພາບ ມີຜູ້ເຂົ້າຮ່ວມທັງໝົດ 109 ຄົນ ຍິງ 77 ຄົນ; ສຳເລັດຝຶກອົບຮົມຕ່າງໆ ຊຶ່ງມີຜູ້ເຂົ້າຮ່ວມທັງໝົດ 508 ທ່ານ, ສໍາເລັດກອງປະຊຸມຖອດຖອນບົດຮຽນກ່ຽວກັບການຈັດຕັ້ງປະຕິບັດວຽກງານປະກັນສັງຄົມໃນຂອບເຂດທົ່ວປະເທດປະຈໍາປີ 2022; ສຳເລັດກອງປະຊຸມສະພາບໍລິຫານອົງການປະກັນສັງຄົມແຫ່ງຊາດ ປະຈຳປີ 2022, ປະຈຳໄຕມາດ, 6 ເດືອນ, 9 ເດືອນ ປີ 2023, ກອງປະຊຸມວິສາມັນເພື່ອຮັບຮອງແຜນງົບປະມານຂອງອົງການປະກັນສັງຄົມແຫ່ງຊາດ ປະຈໍາປີ 2024; ສຳເລັດການກວດສອບການຈັດຕັ້ງປະຕິບັດວຽກງານອົງການປະກັນສັງຄົມປະຈໍາປີ 2022 ຈາກອົງການກວດ ສອບແຫ່ງລັດ; ສໍາເລັດການທົດລອງໃຫ້ບໍລິການແບບເຄື່ອນທີ່ ສໍາລັບແຮງງານນອກລະບົບ ຫຼຶ ຜູ້ປະກັນຕົນສະໝັກໃຈ ແລະ ສຳເລັດການສ້າງຄູ່ມືແນະນຳການຈັດຕັ້ງປະຕິບັດລິການເຄື່ອນທີ່ ແລະ ໄດ້ຝຶກອົບຮົມໃຫ້ພະນັກງານທົ່ວປະເທດ; ສຳເລັດການເປີດສູນບໍລິການປະກັນສັງຄົມ ເມືອງຮຸນ ແຂວງ ອຸດົມໄຊ ແລະ ເມືອງປາກຊອ່ງ ແຂວງ ຈໍາປາສັກ; ສຳເລັດການຈັດກອງປະຊຸມຮ່ວມກັບ ອົງການແຮງງານສາກົນ 03 ຄັ້ງ: ກອງປະຊຸມລາຍງານການຈັດຕັ້ງ ປະຕິບັດໂຄງການ SOLAR 06 ເດືອນທ້າຍປີ 2022 ແລະ ແຜນ 06 ເດືອນຕົ້ນປີ 2023, ກອງປະຊຸມລາຍງານຜົນການຈັດຕັ້ງປະຕິບັດຂອງຄະນະກໍາມະການຊີ້ນໍາໂຄງການສ້າງຄວາມກ້າວໜ້າລະບົບປົກປ້ອງສັງຄົມ ແລະ ສິດທິດ້ານ ແຮງງານໃນຂະແໜງກາເຟ ແລະ ຊາ ຂັ້ນສຸນກາງ ແລະ ຂັ້ນແຂວງ (ແຂວງ ສາລະວັນ, ເຊກອງ ແລະ ຈໍາປາສັກ) ມີຜູ້ເຂົ້າຮ່ວມທັງໝົດຈໍານວນ 140 ຄົນ, ຍິງ 84 ຄົນ; ສົມທົບກັບຊ່ຽວຊານອົງການແຮງງານສາກົນຄົ້ນຄວ້າ, ສ້າງປື້ມຄູ່ມື ກວດກາວຽກງານປະກັນສັງຄົມ ສໍາເລັດໂດຍພື້ນຖານ ກໍາລັງລຽບລຽງເນື້ອໃນຄືນ ແລະ ຄູ່ມືດໍາເນີນການຈັດຕັ້ງປະຕິບັດການກວດກາແມ່ນສໍາເລັດການຮ່າງສາລະບານ ແລະ ກໍາລັງຄົ້ນຄວ້າເນື້ອໃນ; ສຳເລັດການເຂົ້າຮ່ວມເປັນປະທານກອງປະຊຸມປະກັນສັງຄົມອາຊຽນ ASSA ຄັ້ງທີ 40 ທີ່ປະເທດ ມາເລເຊຍ ແລະ ອື່ນໆ.
 
ເພື່ອເຮັດໃຫ້ກອງປະຊຸມມີເນື້ອໃນ ແລະ ຄວາມໝາຍຄວາມສໍາຄັນຍິ່ງຂື້ນ, ກອງປະຊຸມ ຍັງໄດ້ຮັບຟັງການໂອ້ລົມຂອງທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງ ຮສສ ເຊິ່ງທ່ານໄດ້ຕີລາຄາສູງຕໍ່ກັບຜົນສໍາເລັດທີ່ ອປຊ ຍາດມາໄດ້ ທ່ານກ່າວວ່າ: ຜ່ານການຮັບຟັງການລາຍງານບົດສະຫຼຸບການຈັດຕັ້ງປະຕິບັດວຽກງານໃນໄລຍະ 01 ປີ ທີ່ຜ່ານມາ ແລະ ແຜນຄາດໝາຍສູ້ຊົນໃນຕໍ່ໜ້າ ພ້ອມທັງມີການປະກອບຄໍາຄິດຄໍາເຫັນຢ່າງກົງໄປກົງມາ ເພື່ອແກ້ໄຂບັນຫາທີ່ເກີດຂື້ນ ແລະ ເຮັດໃຫ້ວຽກງານປະກັນສັງຄົມເຄື່ອນໄຫວໄດ້ດີກ່ວາເກົ່າ ດ້ວຍຄວາມເອົາໃຈໃສ່ ແລະ ຄວາມເປັນເຈົ້າການຂອງທຸກພາກສ່ວນ ເຮັດໃຫ້ການລາຍງານມີຄວາມຖືກຕ້ອງ ຊັດເຈນພໍສົມຄວນ ເຮັດໃຫ້ກອງປະຊຸມສາມາດຮັບຮອງບົດສະຫຼຸບ ປະຈໍາປີ 2023 ແລະ ແຜນຄາດໝາຍສູ້ຊົນໃນຊຸມປີຕໍ່ໜ້າ, ເຫັນໄດ້ວ່າມີຄວາມສໍາເລັດໃນຫຼາຍດ້ານ ສະແດງອອກຈາກວຽກງານສໍາຄັນທັງໝົດ ສາມາດບັນລຸແຜນຄາດໝາຍສູ້ຊົນຂອງປີ 2023 ເຖິງວ່າຈະຢູ່ໃນທາມກາງທີ່ພະນັກງານພວກເຮົາ ພົບກັບຄວາມຫຍຸ້ງຍາກທາງດ້ານເສດຖະກິດກໍ່ຕາມ, ຄຽງຄູ່ກັບຜົນສໍາເລັດ ປະກັນສັງຄົມ ຈະຕ້ອງໄດ້ສືບຕໍ່ພັດທະນາປັບປຸງວຽກງານຕ່າງໆໃຫ້ດີຍິ່ງຂື້ນ ໂດຍສະເພາະການວາງແຜນປີ 2024 ແລະ ແຜນໃນຕໍ່ໜ້າ ໂດຍອີງໃສ່ມະຕິກອງປະຊຸມໃຫຍ່ຂອງພັກໃນແຕ່ລະຂັ້ນໂດຍສະເພາະແຜນ 05 ປີໃນຕໍ່ໜ້າ, ແລະ ເພື່ອເປັນແນວທາງຂອງການຄົ້ນຄ້ວາວຽກງານສະເພາະໜ້າ ແລະວຽກໄລຍະຍາວ ເພື່ອຮ່ວມກັນປັບປຸງພັດທະນາຮ່ວມກັນ ຄື 1. ດ້ານພະນັກງານ ຫຼື ບຸກຄະລາກອນ ໃຫ້ມີຄວາມອຸ່ນອຽນ ທຸ່ນທ່ຽງ ເອົາໃຈໃສ່ວຽກງານແນວຄິດ ໂດຍສະເພາະໄລຍະທີ່ທົ່ວສັງຄົມໄດ້ຮັບຜົນກະທົບດ້ານເສດຖະກິດ, ການພັດທະນາບຸກຄະລາກອນ ໃຫ້ແທດເໝາະ ແລະ ທ່ວງທັນກັບຄວາມຮຽກຮ້ອງຕ້ອງການຂອງໜ້າວຽກ ເປັນຕົ້ນ ວຽກງານໄອທີ, ປະຊາສໍາພັນ, ບັນຊີ, ວຽກງານກວດກາ ແລະ ອື່ນໆ ທີ່ມີຄວາມຈໍາເປັນ, ຍົກສູງດ້ານຈັນຍາບັນຂອງການບໍລິການຂອງພະນັກງານທັງສູນກາງ ແລະ ທ້ອງຖິ່ນ ຄຽງຄູ່ກັບການພັດທະນາວຽກງານການບໍລິການໃຫ້ດີຍິ່ງຂື້ນ, 2. ເພີ່ມທະວີການຂະຫຍາຍອັດຕາການປົກຄຸມວຽກງານປະກັນສັງຄົມໃຫ້ສູງຂື້ນ ນໍາໃຊ້ວິທີການ ແລະ ການໂຄສະນາປະຊາສໍາພັນຮູບແບບໃໝ່ໆ ຄຽງຄູ່ກັບການລົງເຄື່ອນໄຫວກວດກາຂອງເຈົ້າໜ້າທີ່ກວດກາຂັ້ນສູນກາງ ແລະ ຄວາມເປັນໄປໄດ້ຂອງການແຕ່ງຕັ້ງເຈົ້າໜ້າທີ່ກວດກາຢູ່ຂັ້ນທ້ອງຖິ່ນ, 3. ການອະທິບາຍ-ຊີ້ແຈງ ຕໍ່ສັງຄົມກ່ຽວກັບບັນຫາການໃຫ້ບໍລິການປິ່ນປົວສູຂະພາບຂອງໂຮງໝໍ ທີ່ເປັນບັນຫາລວມ ແລະ ບັນຫາສະເພາະ ຄຽງຄູ່ກັບການປະສານສົມທົບກັບພາກສ່ວນກ່ຽວຂ້ອງ ເພື່ອແກ້ໄຂປັບປຸງ ແລະ ຮັບປະກັນສິດຜົນປະໂຫຍດຂອງຜູ້ປະກັນຕົນ ພາຍໃຕ້ກົດໝາຍ ແລະ ລະບຽບການທີ່ກ່ຽວຂ້ອງ; 4. ສືບຕໍ່ຍົກລະດັບລະບົບຖານຂໍ້ມູນ ຄຽງຄູ່ກັບການພັດທະນາບຸກຄະລາກອນໃຫ້ທ່ວງທັນກັບການນໍາໃຊ້ລະບົບໂປຼແກມທັນສະໄໝ, ການບໍລິຫານກອງທຶນ ສົມເຫດສົມຜົນ ແນ່ໃສ່ປະສິດທິພາບ ແລະ ປະສິດທິຜົນຂອງວຽກງານ ຄຽງຄູ່ກັບການຍົກສູງວຽກງານຂອງຄະນະການລົງທຶນ; 5. ສໍາຫຼວດຄືນກ່ຽວກັບພາຫະນະ, ເຄື່ອງມື ແລະ ວັດຖຸອຸປະກອນ ເພື່ອໃຫ້ມີຄວາມພ້ອມປະກອບເຂົ້າໃນວຽກງານໃຫ້ມີຜົນສໍາເລັດ ແລະ ຕ້ອງມີການທົດແທນຄືນ ຖ້າມີການຕົກເຫ່ຍ ເສຍຫາຍ ທີ່ເປັນຊັບສິນຂອງອົງກອນຕາມລະບຽບການ, 6. ສືບຕໍ່ຄົ້ນຄ້ວາຄວາມເປັນໄປໄດ້ຂອງການຮ່ວມມືວຽກງານປະກັນສັງຄົມ ລະຫວ່າງ ແຂວງຕໍ່ແຂວງຂອງລາວ ແລະ ປະເທດເພື່ອນມິດ ໂດຍການປະສານສົມທົບກັບ ກົມພົວພັນຮ່ວມມືສາກົນ ແລະອື່ນໆ, ຈາກນັ້ນ ທາງຫົວໜ້າອົງການປະກັນສັງຄົມແຫ່ງຊາດ ໄດ້ຂື້ນກ່າວຮັບຄໍາໂອ້ລົມຂອງປະທານກອງປະຊຸມ ພ້ອມທັງສະຫຼຸບ ແລະ ກ່າວປິດກອງປະຊຸມວຽກງານປະກັນສັງຄົມ ປະຈໍາປີ 2023 ຢ່າງເປັນທາງການ.

 

Array
(
    [type] => 2
    [message] => syntax error, unexpected '(' in /home/ssolaogo/public_html/language/lo-LA/lo-LA.lib_joomla.ini on line 243

    [file] => /home/ssolaogo/public_html/libraries/src/Language/LanguageHelper.php
    [line] => 464
)