ກອງປະຊຸມສະມາຄົມປະກັນສັງຄົມອາຊຽນ ຫຼື ອາຊາ ASEAN Social Security Association (ASSA) ຄັ້ງທີ 40 ໄດ້ໄຂຂື້ນໃນລະຫວ່າງວັນທີ 20-22 ພະຈິກ 2023 ທີ່ ນະຄອນຫຼວງກົວລາລຳເປີ ປະເທດມາເລເຊຍ ພາຍໃຕ້ຫົວຂໍ້: “ເປີດຮັບຄວາມຫຼາກຫຼາຍ, ສ້າງອະນາຄົດຮ່ວມກັນ” ແລະ ສະເຫຼີມສະຫຼອງ ວັນສ້າງຕັ້ງສະມາຄົມປະກັນສັງຄົມອາຊຽນ ຄົບຮອບ 25 ປີ ໂດຍປະເທດມາເລເຊຍເປັນເຈົ້າພາບ ແລະ ອົງການປະກັນສັງຄົມແຫ່ງຊາດ ຂອງ ສປປ ລາວ ເປັນປະທານກອງປະຊຸມ. ກອງປະຊຸມດັ່ງກ່າວ ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ ໄດ້ໃຫ້ກຽດກ່າວເປີດກອງປະຊຸມຢ່າງເປັນທາງການ ຊຶ່ງມີຜູ້ເຂົ້າຮ່ວມຈາກ 10 ປະເທດ ອາຊຽນ ຊຶ່ງມີ 19 ອົງກອນທີ່ເປັນສາມະຊິກ, ມີຜູ້ຊ່ຽວຊານຂື້ນບັນຍາຍຈາກປະເທດອົດສະຕຼາລີ, ສະມາຄົມປະກັນສັງຄົມສາກົນ International Social Security Association (ISSA) ແລະ ອົງການແຮງງານສາກົນ International Social Security Organization (ISSO) ລວມແຂກຖືກເຊີນພາຍໃນ ແລະ ຕ່າງປະເທດ ທັງໝົດ 150 ກວ່າຄົນ.
 
ໃນໂອກາດດັ່ງກ່າວ, ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ ໃນນາມປະທານກອງປະຊຸມອາຊາຄັ້ງທີ 40 ທ່ານ ກ່າວວ່າ: ກອງປະຊຸມສະມາຄົມປະກັນສັງຄົມອາຊຽນ ຫລື ອາຊາ ຄັ້ງທີ 40 ພາຍໃຕ້ຫົວຂໍ້: “ເປີດຮັບຄວາມຫຼາກຫຼາຍ, ສ້າງອານາຄົດຮ່ວມກັນ” ຊຶ່ງເປັນກອງປະຊຸມທີ່ມີຄວາມໝາຍສໍາຄັນ ທີ່ພວກເຮົາຈະໄດ້ພ້ອມກັນປຶກສາຫາລື ແລະ ແລກປ່ຽນບົດຮຽນທີ່ດີລະຫວ່າງປະເທດສະມາຊິກດ້ວຍກັນ ແລະ ບົດຮຽນທີ່ດີຈາກບັນດາ ອົງການຈັດຕັ້ງສາກົນ ໃນຫົວຂໍ້ສຳຄັນຕ່າງໆ ເພື່ອເປັນຂໍ້ມູນທີ່ດີໃຫ້ພວກເຮົານຳໄປຄົ້ນຄວ້າ ແລະ ໝູນໃຊ້ເຂົ້າໃນການຈັດຕັ້ງປະຕິບັດວຽກງານປະກັນສັງຄົມ ຂອງບັນດາປະເທດສະມາຊິກໃຫ້ມີການພັດທະນາໄປພ້ອມໆກັນ. ນອກຈາກ ຫົວຂໍ້ສໍາຄັນໃນການສົນທະນາປຶກສາຫາລື ກອງປະຊຸມຍັງໄດ້ເຊັນບົດບັນທຶກຄວາມເຂົ້າໃຈ (MOU) ໃນການຮ່ວມມືສອງຝ່າຍລະຫວ່າງ ສະມາຄົມປະກັນສັງຄົມອາຊຽນ ແລະ ສະມາຄົມປະກັນສັງຄົມສາກົນ ຊຶ່ງໃຫ້ກຽດລົງນາມບົດບັນທຶກ ໂດຍທ່ານ ນາງ ແກ້ວ ຈັນທະວີໄຊ ປະທານ ອາຊາ ແລະ ທ່ານ Azman Bin Dato’ Aziz Mohammed ປະທານ ອິດຊາ (President of ISSA) ເພື່ອແນ່ໃສ່ການປະສານງານ ຊຸກຍູ້ ແລະ ເພີ່ມທະວີການຮ່ວມມືລະຫວ່າງສອງຝ່າຍ ແລະ ກຳນົດຂອບເຂດຄວາມສຳຄັນ ແລະ ບັນດາວິທີການຮ່ວມມື ໃນການຊຸກຍູ້ ການແລກປ່ຽນການປະຕິບັດທີ່ດີ ແລະ ມີຫົວຄິດປະດິດສ້າງໃນການປະກັນສັງຄົມ, ສ້າງຄວາມສາມາດໃຫ້ແກ່ອົງການປະກັນສັງຄົມໃນພາກພື້ນອາຊຽນ ໃຫ້ມີຄວາມເຂັ້ມແຂງ.
 
ຈຸດປະສົງຂອງກອງປະຊຸມອາຊາ (ASSA) ແມ່ນເພື່ອສ້າງສາຍພົວພັນການຮ່ວມມືລະຫວ່າງບັນດາປະເທດໃນອາຊຽນກ່ຽວກັບວຽກງານປະກັນສັງຄົມ ເພື່ອປົກປ້ອງຜູ້ອອກແຮງງານກໍ່ຄືປະຊາກອນ ໃຫ້ໄດ້ຮັບການດູແລທາງດ້ານ ສະຫວັດດີການຈາກລະບົບປະກັນສັງຄົມ ໂດຍບໍ່ປະຖິ້ມໃຜໄວ້ຂ້າງຫລັງ. ກອງປະຊຸມຄັ້ງນີ້ ບັນດາຜູ້ຊ່ຽວຊານໄດ້ຜັດປ່ຽນກັນຂື້ນບັນຍາຍໃນຫຼາຍຫົວຂໍ້ ເຊັ່ນ: ການປົກປ້ອງສັງຄົມສໍາລັບແຮງງານນອກລະບົບ, ສິ່ງທ້າທາຍ ແລະ ຍຸດທະສາດ ການຈ້າງງານ ໂດຍຜູ້ຊ່ຽວຊານຈາກປະເທດອົດສະຕາລີ, ການຂະຫຍາຍອັດຕາການປົກຄຸມປະກັນສັງຄົມສູ່ຜູ້ດ້ອຍໂອກາດ ໂດຍຜູ້ຊ່ຽວຊານຈາກປະເທດມາເລເຊຍ, ອິນໂດເນເຊຍ, ສສ ຫວຽດນາມ ແລະ ໄທ, ນະໂຍບາຍປະກັນສັງຄົມຕໍ່ແຮງງານເຄື່ອນຍ້າຍໃນອາຊຽນ, ການປະຕິຮູບອຸດໜູນບໍານານ.
 
ກອງປະຊຸມຄະນະກໍາມະການປະກັນສັງຄົມອາຊຽນ (ASSA Board Meeting) ແລະ ກອງປະຊຸມກອງເລຂາ ອາຊາ ຄັ້ງທີ 40 ໄດ້ປຶກສາຫາລືຫຼາຍບັນຫາ ທີ່ຕິດພັນກັບການພັດທະນາວຽກງານປະກັນສັງຄົມ ເປັນຕົ້ນແມ່ນລະບຽບການ ແລະ ເງື່ອນໄຂການເຂົ້າເປັນສະມາຊິກ ອາຊາ, ການສ້າງຕັ້ງກອງເລຂາຖາວອນ ຫຼື ເຄິ່ງຖາວອນ, ການລົງທຶນແບບຍືນຍົງ, ການສ້າງອົງກອນໃຫ້ມີຄວາມຍືນຍົງ ແລະ ການນໍາໃຊ້ມາດຕະການລາຍງານການເງິນສາກົນທີ່ອອກໂດຍ ຄະນະກໍາມະການມາດຕະຖານບັນຊີສາກົນ ໃນເດືອນ ພຶດສະພາ 2017 ລະບຽບການສະຫຼຸບລາຍງານການເງິນປະກັນສັງຄົມສາກົນ (International Financial Reporting Standard that was issued by the International Accounting Standards Board in May 2017, ສະບັບເລກທີ 17 ຫຼື IFRS number 17) ແລະ ບັນຫາອື່ນໆ. ໃນວາລະກອງປະຊຸມນີ້ ອົງການປະກັນສັງຄົມແຫ່ງຊາດ ຂອງ ສປປ ລາວ ໄດ້ມອບຕໍາແໜ່ງ ປະທານ ອາຊາ ໃຫ້ອົງການປະກັນສັງຄົມ ປະເທດມາເລເຊຍ ພ້ອມທັງແຕ່ງຕັ້ງຮອງປະທານ ອາຊາ ແລະ ຫົວໜ້າກອງເລຂາ ອາຊາ ຄົນໃໝ່. ນອກນັ້ນ ກໍ່ໄດ້ປຶກສາຫາລື ແລະ ຄົ້ນຄວ້າໃນການວາງແຜນກອງປະຊຸມອາຊາຄັ້ງຕໍ່ໄປ ໂດຍແມ່ນ ອົງການປະກັນສັງຄົມ ປະເທດຟີລິປິນ ຈະເປັນເຈົ້າພາບຈັດກອງປະຊຸມ ອາຊາ ຄັ້ງທີ 41 ທີ່ ນະຄອນຫຼວງ ມະນິລາ ໃນປີ 2024.

 

Array
(
    [type] => 2
    [message] => syntax error, unexpected '(' in /home/ssolaogo/public_html/language/lo-LA/lo-LA.lib_joomla.ini on line 243

    [file] => /home/ssolaogo/public_html/libraries/src/Language/LanguageHelper.php
    [line] => 464
)