• ​ເງື່ອນ​ໄຂ ການເກີດສິດ

- ຖອກ​ເງິນ​ສົມທົບເຂົ້າກອງທຶນ​ແຕ່ 12 ​ເດືອນຂຶ້ນ​ໄປ​ໃນ​ໄລຍະ 24 ເດືອນສຸດ​ທ້າຍ;

- ​ການລົ້ມລະລາຍຂອງຫົວໜ່ວຍແຮງງານ, ຢຸດກິດຈະການ ຫຼື ສິ້ນສຸດໂຄງການຊ່ວຍເຫຼືອເພື່ອການພັດທະນາ (ໂຄງການຊ່ວຍເຫຼືອລ້າ);

- ວ່າງງານຍ້ອນຢຸດກິດຈະການຊົ່ວຄາວ ຈາກຜົນກະທົບທາງໄພພິບັດ;

- ຫົວໜ່ວຍ​ແຮງ​ງານ​ຕ້ອງການ​ຫຼຸດ​ຈຳນວນ​ແຮງ​ງານ ຫຼື ການລະດົມອອກຈາກວຽກ ເນື່ອງຈາກວິກິດທາງດ້ານການເງິນ ໂດຍມີການຢັ້ງຢືນຈາກພາກສ່ວນກ່ຽວຂ້ອງ;

- ມີເອກະສານຢັ້ງຢືນການອອກຈາກຫົວໜ່ວຍແຮງງານ ທີ່ກ່ຽວຂ້ອງຢ່າງຖືກຕ້ອງ;

- ໄດ້ຮັບການຢັ້ງຢືນວ່າງງານ​ແຕ່ 30 ວັນຂຶ້ນໄປ.​

- ສຸຂະພາບ​ແຂງ​ແຮງ ​ແລະ ສາມາດ​ກັບ​ເຂົ້າ​ສູ່​ຕະຫຼາດ​ແຮງ​ງານ​ໄດ້;

- ຖ້າ​ແມ່ນ​ຜູ້​ຮັບ​ອຸດ​ໜູນ​ວ່າງ​ງານ​ມາ​ກ່ອນ​ຕ້ອງ​ໄດ້​ສະ​ສົມ​ເງິນ​ສົມທົບ 12 ເດືອນ​ຂຶ້ນ​ໄປ.

       ຜູ້ປະກັນຕົນ ທີ່ອອກຈາກວຽກ ຕ້ອງຂຶ້ນທະບຽນວ່າງງານ ພາຍໃນ 30 ວັນ ນັບຈາກມື້ອອກຈາກ ວຽກເປັນຕົ້ນໄປ ຈຶ່ງຈະສາມາດຂໍຮັບການອຸດຫນູນວ່າງງານໄດ້ຕາມເງື່ອນໄຂ, ພາຍຫຼັງການຂຶ້ນທະບຽນແລ້ວ ຕ້ອງຄົບ ສາມສິບວັນຂຶ້ນໄປ ຈຶ່ງຈະໄດ້ຮັບໃບຢັ້ງຢືນວ່າງງານ ຈາກພາກສ່ວນທີ່ກ່ຽວຂ້ອງ;
ສໍາລັບຜູ້ປະກັນຕົນທີ່ໄດ້ຮັບການອຸດຫນູນວ່າງງານຄັ້ງທີຜ່ານມາແລ້ວ ແຕ່ພາຍໃນ ສາມສິບວັນຕໍ່ມາຍັງບໍ່ ສາມາດຊອກວຽກໄດ້ ການຂໍອຸດຫນູນວ່າງງານຄັ້ງຕໍ່ໄປ ຕ້ອງໄດ້ຮັບການຢັ້ງຢືນການວ່າງງານຢ່າງຕໍ່ເນືອງເປັນ ແຕ່ລະເດືອນ ຈາກພາກສ່ວນກ່ຽວຂ້ອງ ແລະ ຕ້ອງຢືນເອກະສານບໍ່ໃຫ້ກາຍ 45 ວັນ ໂດຍນັບຈາກການຮັບ ອຸດຫນູນວ່າງງານຄັ້ງທີ່ຜ່ານມາ ຫາກກາຍກໍານົດດັ່ງກ່າວຖືວ່າເປັນການສິ້ນສຸດການຮັບອຸດຫນູນວ່າງງານ. ເງື່ອນໄຂ ທີ່ບໍ່ໄດ້ຮັບການອຸດຫນູນວ່າງງານ ມີດັ່ງນີ້:
   1) ເຮັດວຽກຕາມລະດູການ ຫຼື ຕາມຜະລິດຕະພັນ;
   2) ລະເມີດສັນຍາແຮງງານ ຫຼື ກົດລະບຽບພາຍໃນຂອງຫົວຫນ່ວຍແຮງງານ;
   3) ສະຫມັກໃຈລາອອກດ້ວຍເຫດຜົນຕ່າງໆ;
   4) ຜູ້ປະກັນຕົນທີ່ຢູ່ໃນໄລຍະຮັບການອຸດຫນູນປະກັນສັງຄົມ ແລະ ຜູ້ຄົບເງື່ອນໄຂຮັບອຸດຫນູນບໍານານ;

   5) ໄລຍະພັກແລ້ງຂອງຄູ ໃນໂຮງຮຽນຂອງເອກະຊົນ;
   6) ສິ້ນສຸດສັນຍາແຮງງານ ລະຫວ່າງ ຜູ້ອອກແຮງງານ ແລະ ຜູ້ໃຊ້ແຮງງານ.

• ເອກະສານປະກອບໃນການຂໍອຸດຫນູນວ່າງງານ:

1) ເອກະສານຢັ້ງຢືນ ການອອກວຽກຈາກຫົວຫນ່ວຍແຮງງານ ທີ່ກ່ຽວຂ້ອງຢ່າງຖືກຕ້ອງ;

2) ສັນຍາແຮງງານ;

3) ໃບແຈ້ງປົດປ່ອຍລວມ ໂດຍມີລາຍເຊັນຢັ້ງຢືນຂອງຜູ້ໃຊ້ແຮງງານ (ສະບັບສໍາເນົາ); ຖ້າປົດປ່ອຍອອກໃນເງື່ອນໄຂການລະດົມໃຫ້ອອກ ຕ້ອງມີຂໍ້ຕົກລົງ ຫຼື ມະຕິຕົກລົງ ຫຼື ແຈ້ງການ ຫຼື ບົດ ລາຍງານ ຂອງຜູ້ໃຊ້ແຮງງານ ຫຼື ເອກະສານຢັ້ງຢືນຈາກພາກສ່ວນທີ່ກ່ຽວຂ້ອງທີ່ຫົວຫນ່ວຍແຮງງານຂຶ້ນກັບ ປະກອບເພີ່ມເຕີມ;
4) ໃບປົດປ່ອຍສະເພາະບຸກຄົນ ໂດຍມີລາຍເຊັນຢັ້ງຢືນຂອງຜູ້ໃຊ້ແຮງງານ (ສະບັບຕົ້ນ); 5) ເອກະສານອື່ນໆ ທີ່ລະບຸຢູ່ໃນແບບຟອມການຮ້ອງຂໍອຸດຫນູນວ່າງງານ.

• ຜົນ​ປະ​ໂຫຍ​ດ ຫຼື ການ​ອຸດ​ໜູນ ທີ່ຈະໄດ້ຮັບ:

ຜູ້ປະກັນຕົນ ທີ່ຄົບເງື່ອນໄຂຈະໄດ້ຮັບເງິນອຸດໜູນວ່າງງານ ເທົ່າກັບ 60% ຂອງເງິນເດືອນປະກັນ ຕົນສະເລ່ຍໃນໄລຍະ 6 ເດືອນສຸດທ້າຍຂອງຜູ້ກ່ຽວ ​ແລະ ​ເບີກ​ຈ່າຍ​ເປັນ​ລາຍ​ເດືອນດັ່ງນີ້:

- ຖອກເງິນສົມທົບແຕ່ 12 ຫາ 36 ເດືອນຈະໄດ້ຮັບເງິນອຸດໜູນບໍ່ເກີນ 3 ເດືອນ.

- ຖອກເງິນສົມທົບແຕ່ 37 ຫາ 72 ເດືອນຈະໄດ້ຮັບເງິນອຸດໜູນບໍ່ເກີນ 6 ເດືອນ.

- ຖອກເງິນສົມທົບແຕ່ 73 ຫາ 144 ເດືອນຈະໄດ້ຮັບເງິນອຸດໜູນບໍ່ເກີນ 9 ເດືອນ.

- ຖອກເງິນສົມທົບນັບແຕ່ 145 ເດືອນຂຶ້ນໄປຈະໄດ້ຮັບເງິນອຸດໜູນບໍ່ເກີນ 12 ເດືອນ.

• ການສິ້ນສຸດເງິນອຸດໜູນວ່າງງານ

- ໝົດກຳນົດການຮັບເງິນອຸດໜູນ;

- ປະຕິເສດການຮັບວຽກໃໝ່ ໂດຍ​ບໍ່​ມີ​ເຫດຜົນ;

- ມີ​ວຽກເຮັດງານ​ທຳໃໝ່;

- ເສຍຊີວິດ.