ໃນວັນທີ 18 ມິຖຸນາ 2026 ນີ້, ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດພິທີປະກາດການຈັດຕັ້ງ ກ່ຽວກັບການຍົກຍ້າຍ ແລະ ແຕ່ງຕັ້ງພະນັກງານນຳພາ-ຄຸ້ມຄອງ ຂັ້ນຫົວໜ້າກົມ ແລະ ອົງການ ເພື່ອປະຕິບັດຕາມແຜນເຄື່ອນໄຫວວຽກງານ ປະຈຳເດືອນມິຖຸນາ 2026 ຂອງຄະນະພັກ, ຄະນະນຳກະຊວງ.

 

ພິທີດັ່ງກ່າວ ໄດ້ຈັດຂຶ້ນຢ່າງເປັນທາງການ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ປອ ໂພໄຊ ໄຊຍະສອນ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ. ເຂົ້າຮ່ວມໃນພິທີມີ ບັນດາທ່ານຮອງລັດຖະມົນຕີ, ຫົວໜ້າກົມ, ຮອງກົມ, ພ້ອມດ້ວຍສະມາຊິກພັກ ແລະ ພະນັກງານ-ລັດຖະກອນ ອ້ອມຂ້າງກະຊວງ ຮສສ ເຂົ້າຮ່ວມຢ່າງພ້ອມພຽງ.

 

ໃນພິທີ, ໄດ້ມີການຜ່ານດຳລັດຂອງນາຍົກລັດຖະມົນຕີ ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານນຳພາ-ຄຸ້ມຄອງ ຂັ້ນຫົວໜ້າກົມ ແລະ ອົງການ ຂອງກະຊວງແຮງງານ ແລະ ສະຫວັດດີການສັງຄົມ ຢ່າງເປັນທາງການ. ການປັບປຸງບູລະນະກົນໄກການຈັດຕັ້ງໃນຄັ້ງນີ້ ແມ່ນເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ທັງເປັນການສ້າງຂະບວນການ ແລະ ເພີ່ມທະວີຄວາມເຂັ້ມແຂງໃຫ້ແກ່ການຊີ້ນຳ-ນຳພາ ວຽກງານພາຍໃນກະຊວງ ຮສສ ໃຫ້ມີຄວາມເຕີບໃຫຍ່ຂະຫຍາຍຕົວ ແລະ ມີປະສິດທິພາບສູງຂຶ້ນກວ່າເກົ່າ.

 

ພ້ອມດຽວກັນນັ້ນ, ໃນພິທີຍັງໄດ້ປະກາດມອບ-ຮັບ ອຸດໜູນບຳນານ ໃຫ້ແກ່ພະນັກງານນຳພາ-ຄຸ້ມຄອງ ທີ່ໄດ້ອຸທິດຕົນແກ່ຜົນປະໂຫຍດຂອງປະເທດຊາດ ທີ່ໄດ້ຮອດອາຍຸກະສຽນຮັບອຸດໜູນບຳນານຢ່າງສົມເກຽດ ເພື່ອເປັນການຈາລຶກຄຸນງາມຄວາມດີ ແລະ ຜົນງານການເຄື່ອນໄຫວປະຕິວັດ ກໍຄືການອຸທິດເຫື່ອແຮງ, ສະຕິປັນຍາ ເຂົ້າໃນການພັດທະນາວຽກງານແຮງງານ ແລະ ສະຫວັດດີການສັງຄົມ ຕະຫຼອດໄລຍະຜ່ານມາ.

 

ໃນຕອນທ້າຍຂອງພິທີ, ທ່ານ ປອ ໂພໄຊ ໄຊຍະສອນ ກໍໄດ້ໃຫ້ກຽດໂອ້ລົມ ແລະ ເປັນທິດຊີ້ນຳ ເຊິ່ງທ່ານໄດ້ເນັ້ນໜັກໃຫ້ບັນດາສະຫາຍ ທີ່ໄດ້ຮັບການຍົກຍ້າຍ ແລະ ແຕ່ງຕັ້ງໃນຄັ້ງນີ້ ຈົ່ງຍົກສູງຄວາມຮັບຜິດຊອບທາງດ້ານການເມືອງ, ເອົາໃຈໃສ່ຝຶກຝົນຫຼໍ່ຫຼອມຕົນເອງໃນທຸກດ້ານ, ປັບປຸງແບບແຜນວິທີເຮັດວຽກ ໃຫ້ມີວິທະຍາສາດ ແລະ ມີຄວາມລະອຽດຮອບຄອບ. ທ່ານລັດຖະມົນຕີ ຍັງໄດ້ເນັ້ນໜັກໃຫ້ເອົາໃຈໃສ່ຊີ້ນຳ-ນຳພາ ການຈັດຕັ້ງປະຕິບັດວຽກງານສາມສ້າງ (ສອຈ) ໃຫ້ລົງເລິກເຖິງຮາກຖານຢ່າງແທ້ຈິງ, ຄວບຄູ່ໄປກັບ ການຊຸກຍູ້ຫັນເປັນດິຈິຕອນ (Digitalization) ໃນຂະແໜງການແຮງງານ ແລະ ສະຫວັດດີການສັງຄົມ ເພື່ອຍົກລະດັບການບໍລິຫານລັດ ໃຫ້ມີຄວາມທັນສະໄໝ, ໂປ່ງໃສ ແລະ ວ່ອງໄວ.

 

ພ້ອມດຽວກັນນັ້ນ, ທ່ານລັດຖະມົນຕີ ຍັງໄດ້ຮຽກຮ້ອງໃຫ້ຄະນະນຳຊຸດໃໝ່ ເພີ່ມທະວີຄວາມສາມັກຄີພາຍໃນໃຫ້ເປັນປຶກແຜ່ນ, ຍຶດໝັ້ນຫຼັກການລວມສູນປະຊາທິປະໄຕ, ສືບຕໍ່ຊີ້ນຳ-ນຳພາ ພະນັກງານ-ລັດຖະກອນ ພາຍໃນກົມ ແລະ ອົງການຂອງຕົນ ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ກົດໝາຍຂອງລັດ ໂດຍສະເພາະແມ່ນແຜນພັດທະນາວຽກງານແຮງງານ ແລະ ສະຫວັດດີການສັງຄົມ ໃຫ້ປາກົດຜົນເປັນຈິງ, ເພື່ອຮ່ວມກັນພັດທະນາຂະແໜງການ ຮສສ ໃຫ້ມີຄວາມເຕີບໃຫຍ່ເຂັ້ມແຂງ ແລະ ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ຢ່າງມີປະສິດທິຜົນສູງ.