ການຈັດກິດຈະກຳໃນຄັ້ງນີ້ ຖືເປັນສ່ວນໜຶ່ງໃນການກະກຽມຄວາມພ້ອມໃຫ້ນັກສຶກສາປີສຸດທ້າຍ ຂອງ ວິທະຍາໄລ ລາວ-ທ໊ອບ ແລະ ສະຖານບັນໃກ້ຄຽງ ໄດ້ຮັບຮູ້ ແລະ ເຂົ້າໃຈ ກົດໝາຍວ່າດ້ວຍການປະກັນສັງຄົມ ແລະ ລະບຽບການທີ່ກ່ຽວຂ້ອງ ກ່ອນການກ້າວເຂົ້າສູ່ຕະຫຼາດແຮງງານ. ເນື້ອໃນການບັນຍາຍ ໄດ້ສະແດງໃຫ້ເຫັນຄວາມເປັນມາຂອງລະບົບປະກັນສັງຄົມໃນ ສປປ ລາວ, ກຸ່ມເປົ້າໝາຍ, ການຂື້ນທະບຽນ, ພັນທະ ແລະ ສິດຜົນປະໂຫຍດອຸດໜູນຕ່າງໆທີ່ຈະໄດ້ຮັບໃນເວລາເຂົ້າເປັນສະມາຊິກປະກັນສັງຄົມ. ໃນໂອກາດນີ້ ວິທະຍາກອນຍັງໄດ້ມີກິດຈະກໍາແລກປ່ຽນຖາມ-ຕອບ ແລະ ມອບຂອງທີ່ລະນຶກ ໃຫ້ແກ່ຄູ່ອາຈານ ແລະ ນັກສຶກສາ ດ້ວຍບັນຍາກາດຟົດຟື້ນ ເຊິ່ງຈະຊ່ວຍໃຫ້ນັກສຶກສາ ສາມາດຈິນຕະນາການພາບລວມໃນເວລາທີ່ຕົນກ້າວເຂົ້າສູ່ການເປັນພະນັກງານ ທັງພາກລັດ, ວິສາຫະກິດ ແລະ ຜູ້ປະກັນຕົນພາກສະໝັກໃຈ ເຊິ່ງຈະໄດ້ຮັບການຄຸ້ມຄອງທາງດ້ານສະຫວັດດີການທັງໄລຍະສັ້ນ ແລະ ໄລຍະຍາວ.