ວັນທີ 24 ກຸມພາ 2026, ທີ່ຫ້ອງປະຊຸມໃຫຍ່ກະຊວງແຮງງານແລະສະຫວັດດີການສັງຄມ(ຮສສ) ໄດ້ຈັດພິທີປາຖະກະຖາວັນສ້າງຕັ້ງສະຫະພັນກໍາມະບານລາວ ຄົບຮອບ 70 ປີ ແລະ ສ້າງກິດຈະກໍາຂໍ່ານັບຮັບຕ້ອນວັນສ້າງຕັ້ງກໍາມະບານລາວ ຄົບຮອບ 70 ປີ (ວັນທີ 1 ກຸມພາ 1956-1 ກຸມພາ 2026), ເປັນກຽດປາຖະກະຖາໂດຍສະຫາຍ ນາງ ອາລຸນແສງ ວິຈິດວົງສາ ກໍາມະການຄະນະບໍລິຫານງານສູນກາງສະຫະພັນກໍາມະບານລາວ, ມີ ທາ່ນ ປອ ບຸນມາ ສິດທີໂສມ ປະທານສະຫະພັນກຳມະບານກະຊວງຮສສ, ພ້ອມດວ້ຍຄະນະປະທານສະຫະພັນກຳມະບານ-ກຳມະບານຮາກຖານ ແລະສະມາຊິກກຳມະບານກະຊວງຮສສເຂົ້າຮ່ວມຢ່າງພ້ອມພຽງ.

 

ສະຫາຍ ນາງ ອາລຸນແສງ ວິຈິດວົງສາ ໄດ້ຫວນຄືນມູນເຊື້ອແຫ່ງການກໍາເນີດຂອງສະຫະພັນກໍາມະບານລາວ, ໂດຍພາຍໃຕ້ການນໍາພາ-ຊີ້ນໍາ ຂອງພັກປະຊາຊົນລາວ, ສູນກາງພັກໄດ້ມີມະຕິຕົກລົງສ້າງຕັ້ງ ຫ້ອງການກຳມະບານຂຶ້ນຢ່າງເປັນທາງການ, ຢູ່ເຂດທີ່ໝັ້ນແຂວງຫົວພັນ ໃນວັນທີ 1 ກຸມພາ 1956 ຈຸດປະສົງເພື່ອສືບຕໍ່ໂຄສະນາ, ປຸກລະດົມຂົນຂວາຍ, ເຕົ້າໂຮມກຳມະກອນ, ຊາວຜູ້ອອກແຮງງານ ໃຫ້ມີຄວາມຕື່ນຕົວປະຕິວັດ, ມີນໍ້າໃຈຮັກຊາດ, ມີທັດສະນະຊົນຊັ້ນກຳມະກອນ, ເສີມຂະຫຍາຍປະຊາທິປະໄຕ, ມີລະບຽບແບບແຜນ ແລະ ເປັນຕົວແທນໃຫ້ແກ່ການປົກປ້ອງສິດຜົນປະໂຫຍດອັນຊອບທໍາໃຫ້ແກ່ກຳມະກອນ-ຊາວຜູ້ອອກແຮງງານ, ກາຍເປັນກໍາລັງແຮງເຂົ້າຮ່ວມຢ່າງຕັ້ງໜ້າ ແລະ ເປັນເຈົ້າການໃນການຕໍ່ສູ້ກູ້ຊາດ, ປົກປັກຮັກສາ, ສ້າງສາ ແລະ ພັດທະນາປະເທດຊາດ ຕາມເສັ້ນທາງກ້າວຂຶ້ນສັງຄົມນິຍົມ.

 

ເຊິ່ງຕະຫຼອດໄລຍະ 70 ປີ ຜ່ານມາ ສະຫະພັນກຳມະບານລາວ ໄດ້ເອົາໃຈໃສ່ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ ທີ່ພັກໄດ້ມອບໝາຍໃຫ້, ໄດ້ຕັ້ງໜ້າເຄື່ອນໄຫວປະຕິບັດພາລະກິດປະຕິວັດຈັດຕັ້ງນໍາພາສະມາຊິກກຳມະບານ, ກຳມະກອນ ແລະ ຜູ້ອອກແຮງງານ ໃຫ້ມີຄວາມເຂົ້າໃຈ ແລະ ເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ, ລະບຽບໃນການອອກແຮງງານ, ປະຕິບັດສິດ ແລະ ພັນທະຂອງຕົນ, ເສີມສ້າງສະຕິເຄົາລົບລະບຽບວິໄນເຂັ້ມງວດ, ເສີມຂະຫຍາຍມູນເຊື້ອສາມັກຄີປອງດອງ, ນໍ້າໃຈຮັບຜິດຊອບ, ການປະດິດສ້າງໃໝ່, ພັດທະນາສີມືແຮງງານ, ຊຸກຍູ້ຂະບວນການແຂ່ງຂັນຂອງກຳມະບານ ຕິດພັນກັບຂະບວນການຮັກຊາດ ແລະ ພັດທະນາຢ່າງເປັນຂະບວນຟົດຟື້ນ ດັ່ງຄໍາຂວັນທີ່ວ່າ “ກໍາມະບານລາວ ເຂັ້ມແຂງ, ທັນສະໄໝ, ສາມັກຄີ, ມີວິໄນ ແລະ ນໍ້າໃຈສາກົນກຳມະຊີບ”.