ໂຄງການດັ່ງກ່າວ ເປັນການຮ່ວມມືກັນລະຫວ່າງ ອົງການປະກັນສັງຄົມແຫ່ງຊາດ ແລະ ທະນາຄານ ຮ່ວມທຸລະກິດລາວ-ຫວຽດ,​ ຈຸດປະສົງ ກໍ່ເພື່ອເປັນການສ້າງເຄື່ອງມືທີ່ອຳນວຍຄວາມສະດວກໃຫ້ບັນດາຫົວໜ່ວຍວິສາຫະກິດ ສາມາດຊໍາລະເງິນສົມທົບພາກວິສາຫະກິດຜ່ານລະບົບອອນລາຍ,​ ເພີ່ມຄວາມວ່ອງໄວໃນການຊໍາລະໃນແຕ່ລະເດືອນ ແລະ ທັງຮັບປະກັນການເກີດສິດຮັບເງິນອຸດໜູນນຳປະກັນສັງຄົມ,​ ຫຼຸດຜ່ອນບັນຫາແຈ້ງເງິນສົມທົບຜິດພາດໃນແຕ່ລະເດືອນ ແລະອື່ນໆ. ຈາກນັ້ນ ຍັງໄດ້ນໍາພາບັນດາຜູ້ຕາງໜ້າຫົວໜ່ວຍວິສາຫະກິດ ລົງທະບຽນການນຳໃຊ້ລະບົບຊໍາລະເງິນສົມທົບແບບອອນລາຍ.​ ໃນໂອກາດດັ່ງກ່າວ,​ ປະທານຍັງໄດ້ຮຽກຮ້ອງໃຫ້ບັນດາຫົວໜ່ວຍວິສາຫະກິດ ຊ່ວຍແນະນຳ ແລະ ນໍາໃຊ້ລະບົບການຊໍາລະເງິນສົມທົບປະກັນສັງຄົມແບບອອນລາຍຢ່າງທົ່ວເຖິງ ເຊິ່ງລະບົບດັ່ງກ່າວຈະເປັນພື້ນຖານໃນການພັດທະນາລະບົບຊໍາລະເງິນສົມທົບພາກວິສາຫະກິດຂອງປະກັນສັງຄົມໃຫ້ມີປະສິດທິພາບ ແລະ ປະສິດທິຜົນນັບມື້ນັບສູງຂື້ນ.