ສະຫາຍ ໂຈມແຍງ ແພງທອງສະຫວັດ ເລຂາ ຄະນະພັກຮາກຖານ ອົງການປະກັນສັງຄົມແຫ່ງຊາດ ໄດ້ຫືນຄືນເຖິງຄວາມສໍາຄັນຂອງລັດຖະທໍາມະນູນ ວ່າ: ລັດຖະທໍາມະນູນສະບັບທໍາອິດຂອງ ສປປ ລາວ ໄດ້ຖືກຮັບຮອງໃນວັນທີ 15 ສິງຫາ 1991, ເຊິ່ງເປັນເຫດການປະຫວັດສາດທີ່ສໍາຄັນ ທີ່ໄດ້ວາງພື້ນຖານອັນໜັກແໜ້ນໃຫ້ແກ່ການສ້າງລັດແຫ່ງກົດໝາຍ, ຮັບປະກັນສິດ ແລະ ຜົນປະໂຫຍດອັນຊອບທໍາຂອງປະຊາຊົນບັນດາເຜົ່າ, ພ້ອມທັງເປັນເຂັມຊີ້ທິດໃຫ້ແກ່ການພັດທະນາປະເທດຊາດໃຫ້ກ້າວໄປສູ່ຄວາມຈະເລີນຮຸ່ງເຮືອງ. ຕະຫຼອດໄລຍະ 34 ປີຜ່ານມາ, ລັດຖະທໍາມະນູນໄດ້ເປັນພື້ນຖານໃຫ້ແກ່ການສ້າງ ແລະ ປັບປຸງລະບົບກົດໝາຍຕ່າງໆ ຢ່າງຕໍ່ເນື່ອງ, ເປັນກົນໄກສໍາຄັນໃນການປົກປ້ອງເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ. ພ້ອມກັນນັ້ນ, ຍັງໄດ້ສົ່ງເສີມການພັດທະນາເສດຖະກິດ-ສັງຄົມ, ປົກປ້ອງສິດເສລີພາບ ແລະ ປະຊາທິປະໄຕຂອງປະຊາຊົນ, ເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບສູງຂຶ້ນຢ່າງບໍ່ຢຸດຢັ້ງ. ພ້ອມດຽວກັນນັ້ນ ປະທານຍັງໄດ້ຮຽກຮ້ອງໃຫ້ພະນັກງານຫຼັກແຫຼ່ງ ຂອງ ອປຊ ພ້ອມກັນສຶກສາອົບຮົມ, ເຊື່ອມຊຶມ ແລະ ຈັດຕັ້ງປະຕິບັດລັດຖະທໍາມະນູນ ກໍຄື ກົດໝາຍຕ່າງໆ ຢ່າງເຂັ້ມງວດ, ສືບຕໍ່ຜັນຂະຫຍາຍມະຕິ XI ຂອງພັກ ເຂົ້າໃນໜ້າທີ່ຮັບຜິດຊອບຂອງຕົນຢ່າງມີຜົນສໍາເລັດ ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ ໃຫ້ມີຄວາມຈະເລີນກ້າວໜ້າ, ໝັ້ນຄົງ ແລະ ສີວິໄລ.