ໃນຕອນເຊົ້າ ຂອງວັນທີ 6 ມີນາ 2025 ທີ່ອົງການປະກັນສັງຄົມແຫ່ງຊາດ ໄດ້ມີພິທີປະກາດ ແຕ່ງຕັ້ງ ພະນັກງານນຳພາ-ຄຸ້ມຄອງ ຕຳແໜ່ງບໍລິຫານຂັ້ນຫົວໜ້າກົມ-ຫົວໜ້າອົງການ ຂອງກະຊວງແຮງງານ ແລະ ສະຫວັດດີການສັງຄົມ, ໃຫ້ກຽດເປັນປະທານຂອງ ທ່ານ ນ. ໃບຄຳ ຂັດທິຍະ ກຳມະການສູນກາງພັກ, ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ພ້ອມນີ້ຍັງມີ ຄະນະພັກ, ບັນດາຄະນະກົມ, ຄະນະອົງການ ແລະ ຄະນະພະແນກທີ່ຖືກເຊີນເຂົ້າຮ່ວມ.

 

ທ່ານ ຄຳໄຊ ເຊ່ຍຍິ່ງຍ່າງ ກຳມະການຄະນະພັກ, ຫົວໜ້າກົມຈັດຕັ້ງ-ພະນັກງານ ກະຊວງ ຮສສ ໄດ້ຜ່ານດຳລັດດັ່ງນີ້: 1) ດຳລັດວ່າດ້ວຍການແຕ່ງຕັ້ງ ທ່ານ ໂຈມແຍງ ແພງທອງສະຫວັດ ເປັນຫົວໜ້າອົງການປະກັນສັງຄົມແຫ່ງຊາດ, 2) ຜ່ານຂໍ້ຕົກລົງແຕ່ງຕັ້ງ ທ່ານ ວິໄລ ນັນທະສອນ ເປັນຮັກສາການ ຫົວໜ້າກົມນະໂຍບາຍຕໍ່ຜູ້ມີຜົນງານ, ພິການ ແລະ ຜູ້ສູງອາຍຸ ກະຊວງ ຮສສ.

 

ໃນຕອນທ້າຍຂອງພິທີ ຍັງໄດ້ຮັບຟັງການໂອ້ລົມຈາກ ທ່ານ ນ. ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໂດຍທ່ານໄດ້ກ່າວວ່າ: ອີງໃສ່ຄວາມຮຽກຮ້ອງຕ້ອງການໜ້າທີ່ວຽກງານຂອງພັກ-ລັດແຕ່ລະໄລຍະ ທີ່ຕ້ອງໄດ້ມີການປັບປຸງສັບຊ້ອນ ຕໍາແໜ່ງຂັ້ນບໍລິຫານຕ່າງໆ ເພື່ອໃຫ້ສອດຄ່ອງກັບຄວາມເປັນຈິງ ແລະ ໃຫ້ສອດຄ່ອງກັບໜ້າທີ່ວຽກງານອັນສຳຄັນ ໂດຍສະເພາະແມ່ນໃຫ້ສອດຄ່ອງກັບພາລະບົດບາດ, ສິດ ແລະ ໜ້າທີ່ວຽກງານ, ເຊິ່ງເຮັດໃຫ້ຕ້ອງມີພະນັກງານນຳພາ ທີ່ເປັນລະບົບຄົບຊຸດ ເຊິ່ງການປັບປຸງຄັ້ງນີ້ແມ່ນມີຄວາມສໍາຄັນຫຼາຍຢ່າງທີ່ສະແດງໃຫ້ເຫັນວ່າ ບັນດາສະຫາຍລ້ວນແລ້ວແຕ່ເປັນຜູ້ທີ່ມີຄວາມຮູ້-ຄວາມສາມາດ, ມີປະສົບການ ແລະ ມີຜົນງານຫຼາຍດ້ານໃນໄລຍະຜ່ານມາ ຈຶ່ງໄດ້ຮັບຄວາມເຊື່ອໝັ້ນ ແລະ ໄວ້ວາງໃຈຈາກ ຄະນະພັກ ຄະນະນຳ ແລະ ໄດ້ຮັບການຍອມຮັບເປັນຢ່າງດີຈາກສະມາຊິກພັກ-ພະນັກງານ ພາຍໃນ ກະຊວງ ຮສສ ເປັນຜູ້ທີ່ມີປະສົບການຕົວຈິງສົມຄູ່ກັບໜ້າທີ່ວຽກງານ, ທາງດ້ານຄຸນສົມບັດ, ຄຸນທາດການເມືອງກໍມີຄວາມໜັກແໜ້ນ, ເປັນຜູ້ທີ່ຍຶດໝັ້ນຫຼັກການນໍາພາຂອງພັກ, ມີຄຸນສົມບັດສິນທໍາປະຕິວັດ ແລະ ມີຄວາມດຸໝັ່ນອົດທົນ, ມີຄວາມສາມັກຄີ, ມີລະບຽບວິໄນ ແລະ ເຄົາລົບກົດລະບຽບ ຂອງພັກ ແລະ ກົດໝາຍຂອງລັດ ໂດຍເຫັນໄດ້ທ່າແຮງ ແລະ ຄວາມສາມາດບົ່ມຊ້ອນ ຂອງບັນດາ ສະຫາຍຄືແນວນັ້ນ ທາງຄະນະພັກ ແລະ ຄະນະນຳກະຊວງ ຈຶ່ງໄດ້ສະເໜີໃຫ້ຂັ້ນເທິງພິຈາລະນາແຕ່ງຕັ້ງ ແລະ ສັບຊ້ອນ ເຂົ້າຮັບໜ້າທີ່.